PRAKTIKETAKO
HAUSNARKETA
Aurten, praktikak nire herritik gertu egiteko aukera izan dut, Orioko Herri
Ikastolan hain zuzen ere, eta niretzat oso esperientzia aberasgarria izan dela
esan beharra daukat. Hasteko, ikastolako zenbait pertsona ezagutzen nituenez
edozein zalantza edo galdera egiteko konfiantza osoa nuen.
Horrez gain, ikastola honek pedagogia berritzaile bat erabiltzen duenez
hezkuntzari buruzko ikuspegi desberdin bat ezagutzeko aukera izan dut eta honen
inguruan esan dezaket asko gustatu zaidala nola egiten duten lan. Izan ere,
ikastetxe barnean ez dago paretarik eta horrek haurrei espazio batetik bestera
mugitzeko askatasuna ematen die. Horrela, haurrek duten mugitzeko beharrei
erantzuten diete eta gainera, haurrek tentsioak deskargatzeko aukera daukate.
Gainera, ikastetxe bertan dauden baliabide materialak umeek beraien
gaitasunak lantzeko oso egokiak direla pentsatzen dut. Esate baterako,
rokodromo bat, salto egiteko eraikuntza bat, txirrista bat, koltxonetazko
blokeak… zeuden psikomotrizitate lodia landu zezaten; argi mahai bat,
erretroproiektore bat, tenperak, hondarrezko kutxa bat, koloretako paperak…
zeuden esperimentazioa eta psikomotrizitate fina gara zezaten; mozorroak,
zapiak, arropak, panpinak… zituzten haurrek jolas sinbolikoan ari zitezen;
proiektoreak, musika aparatuak… zituzten haurrei musika jartzeko eta abesteko
eta dantzatzeko gaitasunak lantzeko; mahai joko, puzzleak… zituzten pentsamendu
matematikoa eta psikomotrizitate fina lortzeko; imaginarium bat ere bazuten
haurrak erlaxatzeko eta lasai egoteko; eta azkenik, ipuinentzako espazio bat
zuten haurrak hizkuntza idatziarekin lehenengo kontaktua izateko eta hizkuntza gaitasuna
garatzeko.
Bestalde, ikastetxe honetan garrantzi handia ematen zitzaion konfiantzazko
giro bat sortzeari. Horrela, haurrek beraien gaitasunak garatzeko baldintza
aproposak zituzten eta umeek pixkanaka autonomia, autoestimua eta bere
buruarekiko konfiantza lortzen joaten ziren. Hau eskola denetan ez dela
sustatzen pentsatzen dut eta haurren garapena egokia izan dadin ezinbestekoa
dela uste dut.
No hay comentarios:
Publicar un comentario